အပစ်ခတ်ရပ်စဲရေး သဘောတူစာချုပ်( NCA) လက်မှတ်ထိုးခဲ့သည်မှာ ၄ နှစ်နီးပါး ရှိခဲ့သော်လည်း ငြိမ်းချမ်းရေး လုပ်ငန်းစဉ်တွင် ဖက်ဒရယ် ပြည်ထောင်စု တည်ဆောက်ရန် လမ်းစ ဝေဝါးနေဆဲ ဟု ဗိုလ်ချုပ်ကြီး ယွက်စစ် ပြောဆိုလိုက်သည်။
သြဂုတ် ၂၁ ရက် ၂၀၁၉ ထိုင်းနိုင်ငံ ချင်းမိုင်မြို့ တွင် ပြုလုပ်သည့် ငြိမ်းချမ်းရေး လုပ်ငန်းစဉ် ဦးဆောင်အဖွဲ့ PPST အစည်းအဝေး တွင် ယာယီ အဖွဲ့ခေါင်းဆောင် ဗိုလ်ချုပ်ကြီး ယွက်စစ် က အဖွင့် မိန့်ခွန်း ပြောကြားရာတွင်ထည့်သွင်းပြောကြားခဲ့ခြင်း ဖြစ်သည်။
ငြိမ်းချမ်းရေး လုပ်ငန်းစဉ် နှင့် ပတ်သက်ပြီး ပြန်လည်သုံးသပ်ကြည့်ပါက ဖက်ဒရယ် ပြည်ထောင်စု တည်ဆောက်ရေး အတွက် လမ်းစ မှာ ဝေဝါးနေဆဲ ဖြစ်ကြောင်း၊ ဖက်ဒရယ် ပြည်ထောင်စု ခိုင်ခိုင်မာမာ တည်ဆောက်နိုင်မည့်ဖက်ဒရယ် အခြေခံမူများကို ပြည်ထောင်စု သဘောတူစာချုပ် တွင် ချုပ်ဆိုနိုင်ရန် ဆောင်ရွက်သွားမည်ဖြစ်ကြောင်းလည်း ဆိုပါသည်။
ပြည်သူလူထု အကျိုး၊ပြည်ထောင်စု အကျိုး နှင့် အားလုံး လိုလားတောင့်တ သော ဖက်ဒရယ် ပြည်ထောင်စု တည်ဆောက်နိုင်ရန် အတွက် သက်ဆိုင်သည့် အစုအဖွဲ့အားလုံး စိတ်ရှည်သည်းခံ၊ အပြန်အလှန် ယုံကြည်လေးစားမှု ဖြင့် ဆွေးနွေးကြရန်လည်း ဗိုလ်ချုပ်ကြီး ယွက်စစ် က ပြောကြားလိုက်သည်။
ထို့ပြင် ရှေ့ လုပ်ငန်းစဉ် ချမှတ်ရာတွင် NCA လက်မှတ် မထိုးနိုင်သေးသည့်EAO များ နှင့် ပတ်သက်သည့် အစီအစဉ်များ ပါဝင်ရန် လိုအပ်ကြောင်း၊ ငြိမ်းချမ်းရေး လုပ်ငန်းစဉ် ဆောင်ရွက်ရာတွင် NCA လက်မှတ်ထိုးထားသည့် ၁၀ ဖွဲ့တည်းဖြင့် မပြီးပြည့်စုံကြောင်း လည်း ဗိုလ်ချုပ်ကြီး ယွက်စစ် က မိန့်ခွန်း တွင်ထည့်သွင်းပြောခဲ့သည်။
ဆက်လက်ပြီး“ တပ်မတော်ရဲ့ တဖက်သက် အပစ်ရပ်ကာလ က ဒီသြဂုတ်လကုန်မှာ သက်တမ်းကုန် ဆုံးမှာမို့သက်တမ်း ထပ်မတိုးခဲ့ရင် အပစ်ရပ်ကာလ အလွန် ငြိမ်းချမ်းရေး အခင်းအကျင်းကို ထည့်သွင်း စဉ်းစားဖို့ အရေးကြီး ပါတယ်” ဟုလည်း ဗိုလ်ချုပ် ယွက်စစ်က ဆိုသည်။
ယနေ့ ကျင်းပသည့် PPST အစည်းအဝေး တွင် အဓိက အနေဖြင့် ငြိမ်းချမ်းရေး လုပ်ငန်းစဉ် တစ်ဆို့မှု ကျော်လွှားရေး ကိစ္စ၊ အစိုးရ အဆိုပြုလာသည့် ငြိမ်းချမ်းရေး လုပ်ငန်းစဉ် ရှေ့တိုးရေး နည်းလမ်း(၄) ရပ်၊ ပြည်ထောင်စု ငြိမ်းချမ်းရေး ညီလာခံ ၂၁ရာစု ပင်လုံ၊ PPST စုဖွဲ့မှု နှင့် ပတ်သက်သည့် ကိစ္စများ ဆွေးနွေးသွားမည် ဟု သိရသည်။
ထို့အပြင် အစိုးရ၊ နိုင်ငံရေး ပါတီ အစုအဖွဲ့ များ ၂၀၁၉ ခုနစ် နှစ်ကုန် အတွင်း နှင့် ၂၀၂၀ ခုနစ် ဆန်းပိုင်း တွင် ၂၁ ရာစု ပင်လုံ တကြိမ် ကျင်းပရေး ကိစ္စ (ကျင်းပခြင်း၊ မကျင်းပခြင်း) ကိုပါ ထည့်သွင်းဆွေးနွေးသွားမည် ဟု သိရသည်။
0 comments:
Post a Comment