နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်သည် သြဂုတ် ၁၄ ရက်၊ နံနက် ၉ နာရီ ၁၅ မိနစ်တွင် နေပြည်တော်ရှိ သင်္ဂဟဟိုတယ်၌ ကျင်းပသည့် မဲခေါင်-ဂျပန် ချစ်ကြည်ရေးနှစ် ၂၀၁၉ အခမ်းအနားသို့ တက်ရောက် အမှာစကားပြောကြားသည်။
ရှေးဦးစွာ သာသနာရေးနှင့်ယဉ်ကျေးမှုဝန်ကြီးဌာန အနုပညာဦးစီးဌာနမှ အနု ပညာရှင်များက မြန်မာ့မင်္ဂလာတေးသီချင်း၊ မဲခေါင်နိုင်ငံများနှင့် ဂျပန်နိုင်ငံတို့၏ ရိုးရာ ယဉ်ကျေးမှု အကအလှများ၊ မဲခေါင်- ဂျပန် ဂုဏ်ပြုစုပေါင်းအကတို့ဖြင့် ဖျော်ဖြေ တင်ဆက်ကြပြီး နိုင်ငံတော်၏ အတိုင်ပင်ခံပုဂ္ဂိုလ်က အနုပညာရှင်များကို ဂုဏ်ပြု ပန်းခြင်း ပေးအပ်ချီးမြှင့်သည်။
ထို့နောက် နိုင်ငံတော်၏အတိုင်ပင်ခံပုဂ္ဂိုလ်က အမှာစကားပြောကြား ရာတွင် မဲခေါင်-ဂျပန် ပူးပေါင်းဆောင်ရွက်ရေးအစီအစဉ်ကို ၂၀၀၇ ခုနှစ်တွင် စတင်ခဲ့ပါကြောင်း၊ မိမိတို့ နိုင်ငံတွင်သာမက အခြားသော ဖွံ့ဖြိုးတိုးတက်မှု နောက်ကျသည့် နိုင်ငံများကို ဂျပန်နိုင်ငံက အကူအညီပေးခဲ့သည့်အတွက် ကျေးဇူးတင်ရှိပါကြောင်း၊ မိမိတို့ ရည်မှန်း ချက်မှာ မဲခေါင်ဒေသနိုင်ငံများ၏ လူမှုရေးနှင့် စီးပွားရေးကဏ္ဍများ ဖွံ့ဖြိုးတိုးတက်လာ စေရေးပင် ဖြစ်ပါကြောင်း။
၂၀၁၉ ခုနှစ်မှ ၂၀၂၂ ခုနှစ်အထိ (၃)နှစ်တာကာလအတွင်း အကောင် အထည် ဖော်ဆောင်ရွက်သွားမည့် တိုကျိုမဟာဗျူဟာ ၂၀၁၈ ကိုလည်း ချမှတ်ခဲ့ပါကြောင်း၊ ထိုသို့ ချမှတ်ဆောင်ရွက်ရာတွင် ဒေသတွင်း ပေါင်းစည်းချိတ်ဆက်မှု မြှင့်တင်ရေး မဏ္ဍိုင်၊ ပြည်သူအခြေပြု အဖွဲ့ အစည်းမဏ္ဍိုင်နှင့် စိမ်းလန်းသောမဲခေါင် ဟူသည့် မဏ္ဍိုင် (၃)ရပ်ကို ဦးစားပေးဆောင်ရွက်သွားမည်ဖြစ်ပါကြောင်း။
မိမိတို့ ပြည်သူပြည်သားများ ပိုမိုနားလည်မှု၊ ခင်မင်မှု၊ ပူးပေါင်း ဆောင်ရွက်မှုရှိ ရေးကို အဓိကဦးတည်ခြင်းပင် ဖြစ်ပါကြောင်း၊ ထိုသို့ ဆောင်ရွက် ခြင်းအားဖြင့် မိမိတို့ နိုင်ငံ၊ ဒေသတွင်းနှင့် တစ်ကမ္ဘာလုံးအတွက် အကျိုးရှိစေမည့် စိန်းလန်းစိုပြေရေးကို ဆောင်ရွက်သွားမည်ဖြစ်ပါကြောင်း။
ယခုနှစ် ၂၀၁၉ ခုနှစ်ကို မဲခေါင်-ဂျပန် ချစ်ကြည်ရေးနှစ်အဖြစ် သတ်မှတ်ထား ပါကြောင်း၊ မြန်မာနိုင်ငံအနေဖြင့် မဲခေါင်ဒေသကို အခြေခံသည့် ရုပ်ရှင်ရိုက်ကူးခြင်း၊ မဲခေါင်ဒေသ စီးပွားရေး၊ ဖွံ့ဖြိုးရေးနှင့်ပတ်သက်သော ထွန်းသစ်စလူငယ်လုပ်ငန်းရှင် များ၏ အောင်မြင်သည့် စီမံကိန်းများ တင်ပြခြင်းနှင့် မဲခေါင်အလှ ပန်းချီပြပွဲ/ပြိုင်ပွဲ ကျင်းပခြင်းဆိုသည့် အစီအစဉ်(၃)ခုကို ဆောင်ရွက်သွားမည်ဖြစ်ပါကြောင်း။
အထူးသဖြင့် မိမိတို့သည် လူငယ်လုပ်ငန်းရှင်များ၏ ကဏ္ဍကို အထူးအလေးထား ပါကြောင်း၊ မိမိတို့ နိုင်ငံသည် အာဆီယံဒေသတွင်း ဖွံ့ဖြိုးမှုနည်းသည့် နိုင်ငံတွင် ပါဝင်ပါ ကြောင်း၊ ထို့ကြောင့် မိမိတို့နိုင်ငံ ဖွံ့ဖြိုးတိုးတက်မှု ရရှိရေးအတွက် လူငယ်လုပ်ငန်းရှင် များကို အားကိုးပါကြောင်း၊ စီးပွားရေးအတွက် သာမကဘဲ ဆန်းသစ် တီထွင်တတ် သည့် လူငယ်များ၏ ဥာဏ်ပညာ၊ အတွေးအခေါ် များကိုလည်း အားကိုးပါကြောင်း။
ထို့ကြောင့် ယနေ့ကဲ့သို့ နေ့မျိုးသည် လူငယ်လုပ်ငန်းရှင်များ၏ တီထွင်နိုင်သည့် အရည်အသွေးနှင့် ဥာဏ်ပညာကို အားပေးသည့် နေ့တစ်နေ့ဖြစ်သည်ဟု ယူဆပါ ကြောင်း၊ ယခုဆိုလျှင် စတုတ္ထမြောက် နည်းပညာတော်လှန်ရေး စတင်နေပြီဟု ကမ္ဘာက သတ်မှတ်ထား ပါကြောင်း။
ထိုကဲ့သို့ စတုတ္ထမြောက် နည်းပညာတော်လှန်ရေး၏ ကောင်းကျိုးများကို တော် တော်များများက မီးမောင်းထိုးကြည့်နေကြပါကြောင်း၊ သို့သော်ငြားလည်း နည်းပညာ တော်လှန်ရေး၏ ဆိုးကျိုးများရှိသည် ကိုလည်း မမေ့သင့်ပါကြောင်း၊ မည်သည့်ကိစ္စမဆို ကောင်းကျိုး၊ ဆိုးကျိုးဖြစ်ပေါ်နိုင်သည့်အတွက် ကောင်းကျိုးများကို ဦးစားပေးဆောင် ရွက်ရင်း ဆိုးကျိုးများ ပျောက်ကွယ်စေရန် ဆောင်ရွက်သွားရမည် ဖြစ်ပါကြောင်း။
နည်းပညာတော်လှန်ရေးခေတ်တွင် လူသားများ၏ အရည်အသွေးနှင့် အရေးပါမှု ကို အလေးထားရမည်ဖြစ်ပါကြောင်း၊ အဓိကထားရမည့် အကြောင်းအရာများတွင် လူသားချင်းဆက်ဆံရေးလည်း ပါဝင် ပါကြောင်း၊ လူသားချင်းဆက်ဆံရေးကို အဓိက ထား ဆောင်ရွက် သွားမှသာ မိမိတို့ ကမ္ဘာကြီးသည် အစဉ်အမြဲတိုးတက်မည်ဖြစ်ပါ ကြောင်း။
စီးပွားရေးအောင်မြင်အောင် ဆောင်ရွက်ရာတွင် ပထမဦးဆုံးအနေဖြင့် အခြား သူများ၏ လိုအပ်ချက်က မည်သည့်အရာ ဖြစ်သည်ကို သိရှိအောင် ဆောင်ရွက်ရပါ ကြောင်း၊ မည်သူကမျှ လိုအပ်ခြင်းမရှိသည့် အရာများကို ထုတ်လုပ်ခြင်း၊ လုပ်ဆောင် ခြင်းသည် စီးပွားရေး အောင်မြင်မှု မရရှိနိုင်ပါကြောင်း၊ မိမိတို့နိုင်ငံ ဖွံ့ဖြိုးတိုးတက်ရေး အတွက် မိမိတို့နိုင်ငံသားများ၏ လိုအပ်ချက်ဖြည့်ဆည်းပေးခြင်းဖြင့် တိုးတက်နိုင်မည် ဖြစ်ပါကြောင်း။
ထို့အတူပင် ဒေသတွင်းတွင်လည်း လက်တွဲဖက်နိုင်ငံများသည် တစ်နိုင်ငံနှင့် တစ်နိုင်ငံ လိုအပ်ချက်များကို ဖြည့်ဆည်းပေးရင်းဖြင့် ရှင်သန်သွားမည်ဆိုလျှင် တစ်နေ့ ထက်တစ်နေ့ တိုးတက်လာမည်ဖြစ်ပါကြောင်း၊ လူငယ်များအတွက် မိမိတို့ အစိုးရ အနေဖြင့် အထူး အလေးထားဆောင်ရွက်နေပါကြောင်း။
သို့သော်ငြားလည်း လိုအပ်ချက်များသည် အချိန်နှင့်အမျှ ပြောင်းလဲနေမည် ဖြစ်ပါ ကြောင်း၊ မဲခေါင်ဒေသတွင်းရှိ လူငယ်များ ကမ္ဘာနှင့် ရင်ပေါင်တန်းနိုင်စေရန် အထူး အလေးထားပါကြောင်း၊ မိမိတို့ နိုင်ငံများသည် ဖွံ့ဖြိုးမှုနောက်ကျကျန်ခဲ့ပါကြောင်း။
သို့သော် မိမိတို့ဒေသနိုင်ငံများ၏ ယဉ်ကျေးမှုတွင် တန်ဖိုးရှိသည့် အတွေးအခေါ် များ၊ တန်ဖိုးရှိသည့်အရာများပါဝင်ပါကြောင်း၊ ထိုအရာများကို ထိန်းသိမ်းထား ခြင်းဖြင့် မိမိတို့ နိုင်ငံများ၏ တိုးတက်မှု၊ ဖွံ့ဖြိုးမှုကို ပံ့ပိုးပေးနိုင်မည်ဖြစ်ပါကြောင်း၊ လုပ်ငန်းရှင်များ စီးပွားရေးအရ ပြိုင်ဆိုိင်ရာတွင် ခင်ခင်မင်မင်ပြိုင်ဆိုင်မှုကို မိမိတို့ဆိုလိုခြင်းဖြစ်ပါ ကြောင်း၊ ရန်သူသဖွယ် ပြိုင်ဆိုင်ခြင်းမဟုတ်ဘဲ တစ်ယောက် အရည်အချင်းတက် အောင် ကျန်တစ်ယောက်က တွန်းအားပေးသည့် ပုံစံမျိုးဖြင့် ပြိုင်ဆိုင်မှုကို မိမိတို့ ဆိုလို ခြင်းဖြစ်ပါကြောင်း။
မိမိတို့ မဲခေါင်ဒေသနိုင်ငံများနှင့်အတူ ဂျပန်နိုင်ငံပါဝင်ခြင်းမှာ ၀မ်းသာစရာဖြစ်ပါ ကြောင်း၊ ဂျပန်နိုင်ငံသည် ဖွံ့ဖြိုးတိုးတက်သည့် နိုင်ငံတစ်နိုင်ငံဖြစ်သည့်အလျောက် ဖွံ့ဖြိုး တိုးတက်သည့် နိုင်ငံတစ်ခုနှင့် မိမိတို့ ပြိုင်ဆိုင်ခြင်းဖြင့် မိမ်ိတို့အတွက် အရည်အချင်း များ ပိုမိုတိုးတက်လာအောင် အားပေးနေခြင်းဖြစ်ပါကြောင်း၊ ဂျပန် နိုင်ငံသည် မိမိတို့ နိုင်ငံများအပေါ် ခင်မင်သည့်စိတ်ဓါတ်၊ ဖွံ့ဖြိုးတိုးတက်စေချင်သည့် စေတနာဖြင့် ၀ိုင်းဝန်း လုပ်ဆောင်ပေးနေသည့်အတွက် ယခုလို ကြုံကြိုက်သည့်အချိန်တွင် ကျေးဇူးတင် စကားပြောကြားလိုကြောင်း။
ယခုဆိုလျှင် မိမိတို့ မဲခေါင်ဒေသနိုင်ငံများ၏ ဖွံ့ဖြိုးတိုးတက်မှု မဟာဗျူဟာကို မဲခေါင်ဒေသအတွင်းမှ လူငယ်များ၏ နည်းပညာ၊ တီထွင် ဆန်းသစ် မှုများနှင့် ပေါင်းစပ် ပြီး ပိုမိုဆန်းသစ် အားကောင်း စေရန် အားလုံး ကြိုးပမ်းကြရမည် ဖြစ်ပါကြောင်း၊ ထိုသို့ မျှော်မှန်းချက် များ ထားရှိခဲ့သည့်အတွက် ယနေ့ ကျင်းပသည့် မဲခေါင်-ဂျပန် (၁၀) နှစ် ပြည့် အခမ်းအနားတွင် “မဲခေါင်ဒေသစီးပွားရေး၊ ဖွံ့ဖြိုးရေးနှင့် ပတ်သက်သော ထွန်းသစ်စလူငယ်လုပ်ငန်းရှင်များ၏ စီမံကိန်းများ တင်ပြဆွေးနွေးခြင်း” အစီအစဉ်ကို ထည့်သွင်းခဲ့ခြင်းဖြစ်ပါကြောင်း။
မိမိတို့ နောင်အတွက် စဉ်းစားရန်ဆိုသည်မှာ ယနေ့အပေါ်တွင် အခြေခံပါ ကြောင်း၊ အနာဂတ်သည် ပစ္စုပ္ပန်အပေါ်တွင် အခြေခံခြင်းဖြစ်ပါကြောင်း၊ ယနေ့ခေတ် လူငယ်များသည် နောင်တစ်ခေတ်တွင် လူကြီးများ ဖြစ်ပါကြောင်း၊ မိမိတို့ ဖွံ့ဖြိုးစ နိုင်ငံများကလည်း နောင်တစ်ခေတ်တွင် ဖွံ့ဖြိုးတိုးတက်သည့် နိုင်ငံများ ဖြစ်ရန်မှာ မိမိတို့ မျှော်မှန်းချက်များ ဖြစ်ပါကြောင်း၊ အောင်မြင်မည် ဟုလည်း ယုံကြည်ပါကြောင်း။
ထို့ကြောင့် ယခုကဲ့သို့ ပူးပေါင်းဆောင်ရွက်နိုင်သော အခွင့်အရေး များရလာသည့် အချိန်အခါတွင် အားလုံးက အကျိုးရှိအောင် အသုံးချစေလိုပါကြောင်း၊ မိမိတို့အချင်း ချင်းအကြားတွင် ပိုမိုနားလည်မှုရှိပြီး လက်တွေ့ကျသည့် ပူးပေါင်းဆောင်ရွက်မှုများ ထပ်မံသတ်မှတ်နိုင်ရန်လိုအပ်ပါကြောင်း၊ တိုးတက်ရန်ဆိုသည်မှာ မျှော်လင့်နေရုံ၊ အိမ်မက်မက်နေရုံဖြင့် မရနိုင်ဘဲ ၀ါယမစိုက်ထုတ် အလုပ်လုပ်ယူမှ ရမည်ဖြစ်ပါကြောင်း၊ ဂျပန်နိုင်ငံ၏ ဒုတိယ ကမ္ဘာစစ်နောက်ပိုင်း ဖွံ့ဖြိုးတိုးတက်မှုသည် ဂျပန်နိုင်ငံသူ၊ နိုင်ငံသား များ၏ လုံ့လ၊ ၀ိရီယကြောင့်ဆိုသည်ကို အများက လက်ခံယုံကြည် ပါကြောင်း။
ထို့ကြောင့် မိမိတို့သည်ဂျပန်နိုင်ငံနှင့် ပူးပေါင်းဆောင်ရွက်ပြီး မဲခေါင်-ဂျပန် (၁၀) နှစ်ပြည့်အထိမ်းအမှတ် ကျင်းပသည့် အခမ်းအနားမှ တစ်ယောက်နှင့်တစ်ယောက် မိတ်ဆွေများသဖွယ်၊ တစ်ယောက်နှင့် တစ်ယောက် ဆရာတပည့်များသဖွယ်၊ တစ်ယောက်ဆီက တစ်ယောက် သင်ယူလိုသည့် စိတ်၊ မျှဝေသင်ပေးလိုသည့် စိတ်များ တိုးပွားနိုင် ပါစေဟု ဆုမွန်ကောင်းတောင်းပါကြောင်း ပြောကြားသည်။
ယင်းနောက် နိုင်ငံတကာပြိုင်ပွဲများတွင် ဆုရရှိခဲ့သော လူငယ်များအား ဂုဏ်ပြုဆု များ ချီးမြှင့်ရာ နိုင်ငံတော်၏ အတိုင်ပင်ခံပုဂ္ဂိုလ် က မဲခေါင်အဆင့်တွင် ပထမဆုရရှိခဲ့ပြီး နိုင်ငံတကာအဆင့် ယှဉ်ပြိုင်မှုသို့ တက်ရောက်ကာ အမေရိကန်နိုင်ငံ၌ ကျင်းပသည့် နိုင်ငံတကာ စီးပွားရေးပုံစံငယ် ယှဉ်ပြိုင်ပွဲ ၂၀၁၉ တွင် တတိယဆုရရှိခဲ့သည့် MMtutors Group အား ဆုပေးအပ်ချီးမြှင့်သည်။
ဆက်လက်၍ ပြည်ထဲရေးဝန်ကြီးဌာန ပြည်ထောင်စုဝန်ကြီး ဒုတိယဗိုလ်ချုပ်ကြီး ကျော်ဆွေက ဂျပန်နိုင်ငံ တိုကျိုမြို့တွင် ကျင်းပသည့် စက်ရုပ် ယှဉ်ပြိုင်ပွဲ ၂၀၁၉ တွင် ပထမဆုရ ရှိခဲ့သည့် ရန်ကုန် နည်းပညာတက္ကသိုလ်မှ ကျောင်းသားကျောင်းသူများကို လည်းကောင်း၊ ပညာရေးဝန်ကြီးဌာန ပြည်ထောင်စုဝန်ကြီး ဒေါက်တာမျိုးသိမ်းကြီး က ထိုင်းနိုင်ငံ ဘန်ကောက်မြို့တွင် ကျင်းပသည့် ဆူရာနရီးနည်းပညာတက္ကသိုလ်၏ ပထမ အကြိမ် ကမ္ဘာလုံးဆိုင်ရာ စွန့်ဦးတီထွင်ဆန်းသစ်မှု လူငယ်များ စီးပွားရေး အမြင်သစ် ပုံစံငယ် ယှဉ်ပြိုင်ပွဲ ၂၀၁၈ တွင် ဒုတိယဆုရရှိခဲ့ကြသည့် မန္တလေးတက္ကသိုလ်မှ ကျောင်း သားကျောင်းသူများကိုလည်းကောင်း၊ ဂျပန်သံအမတ်ကြီး Mr.Ichiro Maruyama က အင်ဒိုနီးရှားနိုင်ငံ ဘာလီမြို့တွင် ကျင်းပသည့် အာဆီယံသတင်း အချက်အလက်ဆက် သွယ်ရေး နည်းပညာအတွက် စက်ရုံထိန်းချုပ်မှုလုံခြုံရေး Block Chain နည်းပညာ ယှဉ်ပြိုင်ပွဲ ၂၀၁၈ တွင် ရွှေတံဆိပ် ဆုရရှိခဲ့ကြသည့် ရန်ကုန် နည်းပညာတက္ကသိုလ် ကျောင်းသားတစ်ဦးကိုလည်းကောင်း ဂုဏ်ပြုဆုများ ပေးအပ် ချီးမြှင့်ကြသည်။
ထို့နောက် ဆုရရှိသူများ ကိုယ်စား MMtutors Group မှ မဖူးပွင့်အိမ် က ကျေးဇူး တင်စကားပြောကြားသည်။
ယင်းနောက် နိုင်ငံတော်၏အတိုင်ပင်ခံပုဂ္ဂိုလ်၊ ပြည်ထောင်စုဝန်ကြီးများ၊ ဒုတိယ ၀န်ကြီးများ၊ သံအမတ်ကြီးများ၊ လွှတ်တော်ကော်မတီဥက္ကဋ္ဌများ မြန်မာနိုင်ငံ ကုန်သည် များနှင့် စက်မှုလက်မှုလုပ်ငန်းရှင်များအသင်းချုပ် ဥက္ကဋ္ဌတို့သည် အမြဲတမ်းအတွင်းဝန် များ၊ ညွှန်ကြားရေးမှူးချုပ်များ၊ ဒုတိယညွှန်ကြားရေးမှူးချုပ်များနှင့် လည်းကောင်း၊ မြန်မာနိုင်ငံအတွင်း ကုန်သွယ်မှုနှင့် ရင်းနှီးမြှုပ်နှံမှု ဆောင်ရွက်နေကြသည့် ဂျပန်နိုင်ငံနှင့် မဲခေါင်နိုင်ငံများမှ လုပ်ငန်းရှင်များ၊ ဆုရရှိသူများ၊ ဆွေးနွေးပွဲတွင် ပါဝင်ဆွေးနွေးကြသူ များနှင့်လည်းကောင်း စုပေါင်းမှတ်တမ်းတင် ဓာတ်ပုံရိုက်သည်။
ထို့နောက် နိုင်ငံတော်၏အတိုင်ပင်ခံပုဂ္ဂိုလ်သည် အခမ်းအနား တက်ရောက် လာကြသူများနှင့်အတူ မဲခေါင်-ဂျပန် ချစ်ကြည်ရေးနှစ် ၂၀၁၉ အခမ်းအနားတွင် ထွန်း သစ်စလူငယ်လုပ်ငန်းရှင်များ၏ ဆန်းသစ်တီထွင်ထားသော ကုန်စည်များ၊ နည်းပညာ များ ခင်းကျင်း ပြသထားမှုကို လှည့်လည်ကြည့်ရှုကြသည်။
အခမ်းအနားသို့ ပြည်ထောင်စုဝန်ကြီးများ၊ ဒုတိယ၀န်ကြီးများ၊ လွှတ်တော် ကော်မတီဥက္ကဋ္ဌများနှင့် အဖွဲ့ဝင်များ၊ မြန်မာနိုင်ငံဆိုင်ရာ ဂျပန်နိုင်ငံနှင့် မဲခေါင်နိုင်ငံ များမှ သံအမတ်ကြီးများ၊ သံရုံးကိုယ်စား လှယ်များ၊ ဌာနဆိုင်ရာအကြီးအကဲများ၊ မြန်မာ နိုင်ငံကုန်သည်များနှင့် စက်မှုလက်မှုလုပ်ငန်းရှင်များ အသင်းချုပ် ဥက္ကဋ္ဌနှင့် ညီနောင် အသင်း များမှ ကိုယ်စားလှယ်များ၊ မြန်မာနိုင်ငံအတွင်း ကုန်သွယ်မှုနှင့် ရင်းနှီး မြှုပ်နှံမှု ဆောင်ရွက်နေကြသည့် ဂျပန်နိုင်ငံနှင့် မဲခေါင်နိုင်ငံများမှ လုပ်ငန်းရှင်များ၊ တိုင်းဒေသ ကြီးနှင့် ပြည်နယ်များမှ အငယ်စား၊ အသေးစားနှင့် အလတ်စား စီးပွားရေးလုပ်ငန်းရှင် များနှင့် ဖိတ်ကြားထားသူများ တက်ရောက်ကြသည်။
ယင်းနောက် မဲခေါင်-ဂျပန် ချစ်ကြည်ရေးနှစ်၂၀၁၉ ဆွေးနွေးပွဲ အစီအစဉ်များကို ဆက်လက် ကျင်းပရာ မဲခေါင်ဒေသတွင်း လူငယ်စွန့်ဦးတီထွင်သူများက ၎င်းတို့၏ အောင်မြင်သော စီမံကိန်း အတွေ့အကြုံများကို တင်ပြဆွေးနွေးကြပြီး ပြည်တွင်းပြည်ပ စွန့်ဦးတီထွင် လုပ်ငန်းရှင်များနှင့် ပညာရှင်များက လုပ်ငန်းခွင်များ ၏အနာဂတ် - စွန့်ဦး တီထွင်လုပ်ငန်းရှင်များ၏ အခွင့်အလမ်းများ ခေါင်းစဉ်ဖြင့် စကားဝိုင်းဆွေးနွေးပွဲကို ကျင်းပခဲ့သည်။
Credit - MSCO
The Ladies News
0 comments:
Post a Comment