ငြိမ်းချမ်းရေးလုပ်ငန်းစဉ်များတွင်ချစ်ခြင်းမေတ္တာစိတ်ထားရှိပါက ပြဿနာအားလုံး ၇၅ ရာခိုင်နှုန်း အောင်မြင်ပြီးသားဖြစ်ကြောင်း JMC အရပ်သားကိုယ်စားလှယ်များ မျက်နှာစုံညီအစည်းအဝေးတွင် သဘာပတိ ဦးမောင်မောင်ငြိမ်းက ပြောကြားလိုက်သည်။
ရန်ကုန်မြို့၊ ရွှေလီလမ်းရှိ NRPC ရုံးတွင်သြဂုတ်လ ၁၃ ရက်ကကျင်းပသော သတ္တမအကြိမ် JMC အရပ်သားကိုယ်စားလှယ်များ မျက်နှာစုံညီအဝေးတွင် ယင်းကဲ့သို့ပြောခြင်းဖြစ်သည်။
“ ကျွန်တော့်စိတ်ထဲမှာတော့ ကျွန်တော်တို့အားလုံးဟာညီအကိုမောင်နှမတွေပါ။ ထားမဲ့စိတ်ထားဟာ အဓိကဘာလဲဆိုတော့မေတ္တာနဲ့တည်ဆောက်သွားရမှာပါ။ ကျွန်တော်တို့မြန်မာနိုင်ငံမှာရှိတဲ့ တိုင်းရင်းသားအားလုံးဟာ စိတ်ထားကျွန်တော်တို့နုနယ်သေးတာဖြစ်ပါတယ်။ ချစ်ခြင်းမေတ္တာ တည်ဆောက်တဲ့နေရာမှာလည်းလွယ်ပါတယ်။ မုန်းတဲ့နေရာမှာလည်းလွယ်ပါတယ်။ ဘယ်လိုစိတ်ထားမလဲ။ ဖြူစင်သန့်ရှင်းတဲ့စိတ်ထားဖို့လိုပါတယ်။ အဲဒီစိတ်ထားလေးရှိပြီရှိရင် ဒီပြဿနာတွေဟာလွယ်ကူစွာနဲ့ ဖြေရှင်းနိုင်မှာ ဖြစ်ပါတယ်။ ဒီစိတ်ထားရှိပြီဆိုကတည်းကပြဿနာအပေါ် ၇၅ ရာခိုင်နှုန်းအောင်မြင်ပြီးသား ဖြစ်ပါတယ်’’ဟု သဘာပတိ ဦးမောင်မောင်ငြိမ်းက ပြောသည်။
JMC သည် အပစ်ရပ်လက်မှတ်ထိုးထားသော အဖွဲ့များပစ်ခတ်တိုက်ခိုက်မှုရပ်စဲရေးဆိုင်ရာ ပူးတွဲစောင့်ကြည့်ရေး ကော်မတီဖြစ်ပြီး ၄င်းကော်မတီတွင် တပ်မတော်သားကိုယ်စားလှယ်များ၊ အစိုးရကိုယ်စားလှယ်များ၊ အပစ်ရပ်တိုင်းရင်းသားလက်နက်ကိုင်ကိုယ်စားလှယ်များ၊ အရပ်သားကိုယ်စားလှယ်များပါဝင်သည်။
အစည်းအဝေးသို့ ပြည်ထောင်စုအဆင့် ပစ်ခတ်တိုက်ခိုက်မှုရပ်စဲရေးဆိုင်ရာပူးတွဲစောင့်ကြည့်ရေးကော်မတီ (JMC-U) ဒုတိယဥက္ကဋ္ဌ (၂) ဦးကိုကိုကြီးနှင့် ကော်မတီဝင် အရပ်သားကိုယ်စားလှယ်များ၊ ရှမ်းပြည်နယ်၊ ပဲခူးတိုင်းဒေသကြီး၊ ကရင်ပြည်နယ်၊ မွန်ပြည်နယ်နှင့်တနင်္သာရီတိုင်းဒေသကြီးတို့မှ တိုင်းဒေသကြီး/ ပြည်နယ်အဆင့် ပစ်ခတ်တိုက်ခိုက်မှုရပ်စဲရေးဆိုင်ရာပူးတွဲစောင့်ကြည့်ရေးကော်မတီဝင် အရပ်သား ကိုယ်စားလှယ်များ၊ ရှမ်းပြည်နယ် လင်းခေးနှင့် ကရင်ပြည်နယ် ဖာပွန်တို့မှ ဒေသဆိုင်ရာအဆင့် ပစ်ခတ်တိုက်ခိုက်မှုရပ်စဲရေးဆိုင်ရာပူးတွဲစောင့်ကြည့်ရေးကော်မတီဝင် အရပ်သားကိုယ်စားလှယ်များ၊ ရုံးဝန်ထမ်းများ ပါဝင်တက်ရောက်ခဲ့ကြသည်။
လက်ရှိတွင်အပစ်ရပ်သဘောတူစာချုပ် NCA လက်မှတ် မရေးထိုးရသေးသောအဖွဲ့များမှာ မြောက်ပိုင်း တိုင်းရင်းသားလက်နက်ကိုင်အဖွဲ့များဖြစ်ကြပြီး ကေအိုင်အေ၊ အေအေ၊ အက်စ်အက်စ် ပီပီ၊ ကေအမ်ပီပီ၊ အမ် အမ်မ်ဒီအေ၊ တီအမ်အယ်လ်အေစသည့်အဖွဲ့တို့ဖြစ်ကြသည်။
မင်းသီဟန် ( အကုန်သိ သတင်းဌာန )
0 comments:
Post a Comment