အပူပိုင်းမုန်တိုင်း “ဝီဖာ” ဟာ ဗီယက်နမ်နိုင်ငံ ဗီယက်နမ်နိုင်ငံ၊ ဟနွိုင်းမြို့ရဲ့ အရှေ့-အရှေ့မြောက်ဘက်ကို ဦးတည်နေပြီး ကပ္ပလီပင်လယ်ပြင်နဲ့ ဘင်္ဂလားပင်လယ်အော်တို့မှာ မုတ်သုံလေ အားကောင်းရာမှ အားအလွန်ကောင်းနေတယ်လို့ မိုးဇလက ဒီနေ့မနက် ၇ နာရီမှာ ထုတ်ပြန်ပါတယ်။
မြန်မာစံတော်ချိန် (၀၆:၃၀) နာရီအချိန် တိုင်းထွာချက်အရ တုံကင်ပင်လယ်ကွေ့မှာ ဖြစ်ပေါ်နေတဲ့ အပူပိုင်းမုန်တိုင်း “ဝီဖာ” (Wipha) ဟာ ဗီယက်နမ်နိုင်ငံ၊ ဟနွိုင်းမြို့ (Hanoi) ရဲ့ အရှေ့-အရှေ့မြောက်ဘက် မိုင် (၁၉၀) ခန့်အကွာ ပင်လယ်ပြင်ကို ဗဟိုပြုနေပါတယ်။
အဆိုပါ အပူပိုင်းမုန်တိုင်းဟာ အနောက်ဘက်ကို ဖြည်းညင်းစွာ ရွေ့လျားပြီး ဗီယက်နမ်နိုင်ငံအထက်ပိုင်းဒေသတွေကို ဖြတ်ကျော်ဝင်ရောက်မယ်လို့ ခန့်မှန်းပါတယ်။
ဒီနေ့ညနေအထိ ခန့်မှန်းချက်အရ စစ်ကိုင်းတိုင်းအောက်ပိုင်း၊ မန္တလေးတိုင်းနဲ့ မကွေးတိုင်း တို့မှာ နေရာကျဲကျဲ၊ ကျန်တိုင်းဒေသကြီးနဲ့ ပြည်နယ်တို့မှာ နေရာအနှံ့အပြား မိုးထစ်ချုန်းရွာပြီး၊ ဧရာဝတီတိုင်း၊ တနင်္သာရီ၊ ရခိုင်၊ ကရင်နဲ့ မွန်ပြည်နယ်တို့မှာ ဒေသအလိုက်နဲ့ ပဲခူးတိုင်းနဲ့ ရန်ကုန်တိုင်းတို့မှာ နေရာကွက်ပြီး မိုးကြီးနိုင်ပါတယ်။
မြန်မာ့ကမ်းရိုးတန်းတစ်လျှောက်နဲ့ ကမ်းလွန်ပင်လယ်ပြင်တို့မှာ ရံဖန်ရံခါ မိုးသက် လေပြင်းတွေ ကျရောကေပြီး လှိုင်းကြီးမည်၊ ရေပြင်/မြေပြင်လေဟာ တစ်နာရီလျှင် မိုင် ၄၀ အထိ တိုက်ခတ်နိုင်ပြီး လှိုင်းအမြင့်မှာ ၉ ပေမှ ၁၁ ပေခန့် ရှိနိုင်ပါတယ်။
နောက် ၂ ရက်အတွက် ခန့်မှန်းချက်အရ တနင်္သာရီတိုင်း၊ ရှမ်း၊ ရခိုင်၊ ကရင်နဲ့ မွန်ပြည်နယ်တို့မှာ မိုးပိုနေမယ်လို့ ဆိုပါတယ်။
နေပြည်တော်နဲ့အနီးတဝိုက်အတွက် ဒီနေ့ညနေအထိ ခန့်မှန်းချက်အရ မိုးတကြိမ်၊ နှစ်ကြိမ်၊ ရန်ကုန်မြို့နဲ့ အနီးတဝိုက်မှာ မိုးအသင့်အတင့်၊ မန္တလေးမြို့နဲ့ အနီးတဝိုက်မှာ နေရာကွက်ကျား မိုးထစ်ချုန်းရွာမယ်လို့ ခန့်မှန်းထားပါတယ်။
DVB
0 comments:
Post a Comment