တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်ဟာ မနေ့က ပျဉ်းမနားမြို့က ခရစ်ယာန်နဲ့ အစ္စလာမ်အဖွဲ့တွေကို စားနပ်ရိက္ခာနဲ့ငွေ သွားရောက်လှူဒါန်းခဲ့ပါတယ်။
ဘာသာရေးဆိုင်ရာကိစ္စတွေဆောင်ရွက်ရာမှာ အထောက်အကူဖြစ်ဖို့ လှူဒါန်းရတာလို့ ဗိုလ်ချုပ်မှူးကြီးက ပြောပြီး တပ်မတော်(ကြည်း၊ ရေ၊ လေ) မိသားစုတွေနဲ့ စေတနာရှင်ပြည်သူတွေ ပူးပေါင်းလှူဒါန်းတာလို့ တပ်မတော်ကာကွယ်ရေး ဦးစီးချုပ်ရုံးက ထုတ်ပြန်ပါတယ်။
ဆန်၊ ဆီ၊ ဆား ပဲနဲ့ ငွေတွေကို ပျဉ်းမနားမြို့နယ်ထဲက ခရစ်ယာန်ဘာသာ ဘုရားကျောင်း ၁၁ ကျောင်းနဲ့ အစ္စလာမ်အာရဗီအထက်တန်းကျောင်း၊ ဗလီ ၁၃ ခုတို့ဆီ လှူဒါန်းခဲ့တာပါ။
အလှူငွေလှူတာကို ၁၉၉၆ ခုနှစ်ကစပြီး ဘုန်းကြီးကျောင်းတွေ၊ သီလရှင်စာသင်တိုက်တွေနဲ့ ဘိုးဘွားရိပ်သာတွေကို နှစ်စဉ် ဝါတွင်းကာလတွေမှာ လှူဒါန်းခဲ့ပြီး ဒီနှစ်မှာတော့ ခရစ်ယာန်နဲ့ အစ္စလာမ်ဘာသာရေးကျောင်းတွေကို လှူတာလို့ ဗိုလ်ချုပ်မှူးကြီးက ပြောပါတယ်။
ဘယ်ဘာသာမှာမဆို လှူဒါန်းတာနဲ့ ပတ်သက်ပြီး ကောင်းမွန်တဲ့ အကျိုးရတာကိုပဲ ဖော်ပြထားသလို မြန်မာနိုင်ငံ လူဦးရေရဲ့ ၆ ရာခိုင်နှုန်းလောက်ဟာ ခရစ်ယာန်ဘာသာ ကိုးကွယ်သူတွေ၊ ၄ ရာခိုင်နှုန်းကျော်ဟာ အစ္စလာမ်ဘာသာကိုးကွယ်ကြသူတွေဖြစ်ပြီး မြန်မာနိုင်ငံ အရှေ့၊ အနောက်၊ တောင်၊ မြောက် ဒေသအနှံ့အပြားမှာ ခရစ်ယာန်နဲ့ အစ္စလာမ်ဘာသာ ကိုးကွယ်သူတွေ ရှိတယ်လို့လည်း ပြောပါတယ်။
လှူဒါန်းရာမှာ တပ်မတော်ကာကွယ်ရေးဦးစီးချုပ်နဲ့ ဇနီး၊ ဒုတိယတပ်မတော်ကာကွယ်ရေး ဦးစီးချုပ်နဲ့ ဇနီး၊ ပြည်ထဲရေးနဲ့ ကာကွယ်ရေးဝန်ကြီး၊ တပ်မတော်အရာရှိကြီးတွေ တက်ရောက်ကြပြီး အလှူငွေ ကျပ်သိန်း ၃၀၊ ဆန် အိတ် ၆၀၊ ကုလားပဲ ၅ အိတ်၊ ဆား ၃ အိတ်၊ ဆီ ပိဿာ ၃၀ တို့ကို အသီးသီး လှူဒါန်းခဲ့တယ်လို့ ဆိုပါတယ်။
DVB
0 comments:
Post a Comment