မြန်မာနိုင်ငံမှာဖြစ်ပွားနေတဲ့ အကြမ်းဖက်တိုက်ခိုက်မှုဖြစ်စဉ်တွေကို တရုတ်နိုင်ငံက ပြတ်ပြတ်သားသား ကန့်ကွက်ရှုတ်ချကြောင်းကို တရုတ်သံအမတ်ကြီးက ဗိုလ်ချုပ်မှူးကြီး မင်းအောင်လှိုင်နဲ့ တွေ့ဆုံရာမှာ ပြောကြားခဲ့တယ်လို့ တပ်မတော်ကာကွယ်ရေးဦးစီးချုပ်ရုံးကထုတ်ပြန်ပါတယ်။
တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်ဟာ မြန်မာနိုင်ငံဆိုင် တရုတ် ပြည်သူ့ သမ္မတနိုင်ငံ သံအမတ်ကြီး H.E.Mr.Chen Hai ကို သြဂုတ်(၂၂)ရက် မနက်ပိုင်းက နေပြည်တော်ရှိ ဘုရင့်နောင်ရိပ်သာဧည့်ခန်းမမှာလက်ခံတွေ့ဆုံခဲ့တာဖြစ်ပါတယ်။
အဲဒီတွေ့ဆုံပွဲကို တပ်မတော်ကာကွယ်ရေးဦးစီးချုပ်နဲ့အတူ ကာကွယ်ရေးဦးစီးချုပ်ရုံး(ကြည်း)က တပ်မတော်အရာရှိကြီးတွေ တက်ရောက်ကြပြီး သံအမတ်ကြီးနဲ့အတူ တာဝန်ရှိသူတွေတက်ရောက်ကြပါတယ်။
တွ့ဆုံရာမှာ ရခိုင်ပြည်နယ်အတွင်း လူ့အခွင့်အရေးချိုးဖောက်မှုတွေ အကြောင်းပြပြီး နိုင်ငံတကာက မြန်မာနိုင်ငံအပေါ် ဖိအားပေးဆောင်ရွက်နေမှုတွေကို တရုတ်နိုင်ငံက လက်မခံဘဲ မြန်မာနိုင်ငံဘက်က ရပ်တည်ဆောင်ရွက်ပေးလျက်ရှိတဲ့ အခြေအနေတွေ၊ ပြင်ဦးလွင်မြို့နဲ့ ရှမ်းပြည်နယ်(မြောက်ပိုင်း)တို့မှာ အကြမ်းဖက်တိုက်ခိုက်မှုဖြစ်စဉ်တွေ ဖြစ်ပွားခဲ့တဲ့ အခြေအနေတွေ၊ အဲဒီအကြမ်းဖက်တိုက်ခိုက်မှုဖြစ်စဉ်တွေကို တရုတ်နိုင်ငံက ပြတ်ပြတ်သားသားကန့်ကွက် ရှုတ်ချ ကြောင်းနဲ့ တရုတ်နိုင်ငံရဲ့ရပ်တည်ချက် အခြေအနေတွေ၊ မြန်မာနိုင်ငံရဲ့ ငြိမ်းချမ်းရေးလုပ်ငန်းစဉ်တွေမှာ တရုတ်နိုင်ငံက ကူညီဆောင်ရွက်ပေးနေတဲ့ အခြေအနေတွေ၊ ငြိမ်းချမ်းရေးဆွေးနွေးမှုတွေ တိုးတက်မှုရရှိဖို့နဲ့ လုပ်ဆောင်နိုင်မယ့် အခြေအနေတွေကို ဆွေးနွေးခဲ့တယ်လို့ သိရပါတယ်။
source-တပ်မတော်ကာကွယ်ရေးဦးစီးချုပ်ရုံး
0 comments:
Post a Comment