ဘင်္ဂလားဒေ့ရှ်နိုင်ငံသို့ နေရပ်စွန့်ခွာသူတွေပြန်မလာတာဟာ နိုင်ငံသား သို့မဟုတ် အမည်တခုခု သတ်မှတ်ပေးတာ မရှိတာနဲ့ အသက်အာမခံချက်မရှိတာကြောင့်ဖြစ်တယ်လို့ တဘက်နိုင်ငံမှာ ခိုလှုံရောက်ရှိ နေတဲ့ ဒုက္ခသည်တချို့က ပြောပါတယ်။
ကူတူပါလောင်ဒုက္ခသည်စခန်းမှ မာမတ်ရော်မန်က “ပြန်မလာကြတာကဒီလိုပါ မြန်မာအစိုးရက တာဝန်ခံမှု၊ တာဝန်ယူမူမရှိဘူး။ နိုင်ငံသားမဟုတ်သေးတိုင်အောင် တခုခုသတ်မှတ် ပေးစေချင်တာပါ။ ဥပမာ လူတဦးမှာ နာမည်မရှိသလိုဖြစ်နေပါတယ်။ နိုင်ငံတခုမှာ မွေးဖွားပြီး အသိအမှတ်ပြုမခံရဘူး။ နောက် အသက်အာမခံချက်မရှိဘူး။ ဒါကြောင့် ပြန်မလာချင်ကြတာပါ” လို့ ပြောကြားပါတယ်။
ဘင်္ဂလားဒေ့ရှ်နိုင်ငံသို့ နေရပ်စွန့်ခွာသူတွေကို သြဂုတ်လ ၂၂ ရက်က တတိယအကြိမ် ပြန်လည်လက်ခံဖို့ လျှပ်စစ်နှင့် လမ်းပန်းဆက်သွယ်ရေးဝန်ကြီး ဦးအောင်ကျော်ဇံ နိုင်ငံတော် သမ္မတရုံးမှ ဦးထွန်းထွန်းဝင်း တို့ ကိုယ်တိုင်လာရောက်ပြီး အဆင်သင့်ပြုလုပ်ထားပေမယ့်လည်း တဦးတယောက်မှ ပြန်လည်ဝင်ရောက်လာတာ မရှိခဲ့ပါဘူး။
နေရပ်စွန့်ခွာသွားသူတဦးဖြစ်တဲ့ မာမတ်ဟာချီကတော့ “ကျနော်တို့ ဒုက္ခရောက်ပြီး နေရပ်စွန့်ခွာရတာကို နိုင်ငံတကာက ဘယ်လိုတုံ့ပြန်မလဲဆိုတာ စောင့်ကြည့်ဖို့လိုတယ်။ အခု ပြန်သွားလို့ မဖြစ်သေးဘူး။ ဥပမာ လျှောက်လွှာတခုတင်ထားတယ်။ အဖြေမရသေးဘူး။ ဒါကြောင့် အားလုံးက သဘောတူပြီး မလာဖြစ်တာပါ”လို့ပြောပါတယ်။
၂၀၁၇ သြဂုတ်လက ရခိုင်ပြည်နယ်မှာဖြစ်ပွားခဲ့တဲ့ အကြမ်းဖက်ဖြစ်စဉ်တွေကြောင့် ဘင်္ဂလားဒေ့ရှ်နိုင်ငံဘက်ကို သိန်းနဲ့ချီတဲ့ လူတွေ နေရပ်စွန့်ခွာသွားပြီး နယ်စပ်ရှိ ဒုက္ခသည် စခန်းတွေမှာ ခိုလှုံနေထိုင်နေကြတာပါ။
အဆိုပါဒုက္ခသည်တွေကို မြန်မာပြည်ဘက်ကို အဓမ္မပြန်ပို့မှာမဟုတ်ဘူးလို့ ဘင်္ဂလားဒေ့ရှ်ဝန်ကြီးချုပ် ရှိတ်ဟာစီနာက ကတိပေး ထားပါတယ်။
မိမိဆန္ဒအလျှောက် ပြန်လည်ဝင်ရောက်လာခဲ့တဲ့ တောင်ပြိုလက်ယာအုပ်စု၊ ရဲအောင်ချောင်းရွာနေ မာမတ်ရှော်ရီကနောကတော့ “အဲဒီကပြန်မလာတာက ပြန်လာမယ့်သူတွေ ကို အာဆာအဖွဲ့တွေက ခြိမ်းခြောက်မူတွေရှိတယ်။ အန္တရာယ်ပေးတယ်။ ဒါကြောင့် မလာနိုင်တာပါ။ လာချင်သူတွေများစွာရှိပါတယ်”လို့ပြောပါတယ်။
၂၀၁၈ ဇန်နဝါရီလ ၂၃ ရက်က ပထမတကြိမ်လက်ခံဖို့ ပြင်ဆင်ထားခဲ့ကြသလို ၂၀၁၈ နိုဝင်ဘာ ၁၅ ရက်မှာ ဒုတိယအကြိမ် ပြန်လည်လက်ခံဖို့ မြန်မာဘဘက်က အဆင်သင့် ပြင်ဆင်ထားခဲ့ကြပေမယ့် အောင်မြင်တာ မရှိခဲ့ပါဘူး။
ယခု တတိယအကြိမ် အစီအစဉ်အရ ပထမ အသုတ်အဖြစ် ဒုက္ခသည် အယောက် ၃၄၅ဝ ကို ဩဂုတ် ၂၂ ရက်မှာ ပြန်ပို့ဖို့ မြန်မာနဲ့ ဘင်္ဂလားဒေ့ရှ်နိုင်ငံအစိုးရတို့ သဘောတူ စီစဉ်ခဲ့တာဖြစ်ပြီး တဦးမှ ပြန်လာတာ မရှိခဲ့ပါဘူး။
ကောင်းကောင်း
DVB
0 comments:
Post a Comment