လွှတ်တော်ဒုတိယဥက္ကဋ္ဌရာထူးကိုအသုံးချပြီး မင်းတပ်မြို့၌ NLD ရုံးတည်ဆောက်ခြင်းမဟုတ်ကြောင်း ချင်းပြည်နယ်လွှတ်တော်မှဒုတိယဥက္ကဋ္ဌ ဦးတိတ်ဆန်းက ပြောလိုက်သည်။
မင်းတပ်မြို့၊ စံပြရပ်ကွက်၊ ကွက်စိပ်- ၉ ၊ ၀မ္မသူးမောင်လမ်းပေါ်ရှိ မြေကွက်အမှတ်- ၆၄ နေရာတွင် NLD ရုံး ဆောက်လုပ်ရန် ယာယီရပ်ဆိုင်းထားသည့်အခြေအနေနှင့်ပတ်သက်၍မေးမြန်းရာ၌ ယခုကဲ့သို့ ဖြေကြားပေးခြင်းဖြစ်သည်။
“ လွှတ်တော်အမတ်တုန်းကဒီနေရာကိုမရလို့ လွှတ်တော်ဒုဥက္ကဋ္ဌ ရာထူးရတုန်းမှာ အာဏာပါဝါသုံးပြီး ဒီနေရာမှာရုံးဆောက်လုပ်တယ်ဆိုတာမဟုတ်ပါဘူး။ ကျွန်တော်တို့ NLD ရုံးကမြို့နယ်ရုံးအတွက် နေရာမရှိဘူး။ ဒါကိုဒီမြေနေရာကိုလျှောက်ထားတာ မြိူ့နယ်အုပ်ချုပ်ရေးကိုရော၊ မြေစီမံခန့်ခွဲပိုင်ခွင့်ရှိတဲ့ခရိုင်ရုံးကိုရော တင်ပြလျှောက်ထားခဲ့တာပါ။ အဲဒီကအဆင့်အဆင့်ထောက်ခံချက်တွေနဲ့လုပ်တာပါ။ အခုရပ်ဆိုင်းတာတောင် ယာယီလား၊ အပြီးလား ကျွန်တော်မသိပါဘူး။ ကျွန်တော့်ကိုစွပ်စွဲတိုင်ကြားတာက တစ်ဖက်က အတိုက်အခံပါတီကြီးက လူဦးဆောင်လုပ်တာဆိုတော့ ဒါ အကြောင်းအရာမရှိလို့ နိုင်ငံရေးအရ တိုက်ခိုက်တယ်လို့ပဲ ပြောချင်ပါတယ်’’ ဟု ချင်းပြည်နယ်လွှတ်တော်ဒုတိယဥက္ကဋ္ဌ ဦးတိတ်ဆန်းက ပြောသည်။
အဆိုပါမြေနေရာတွင် NLD ရုံးဆောက်လုပ်ခြင်းမပြုရန် ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီမှ ဦးနိနိုင်း (ယခင်စည်ပင်ဝန်ကြီးဟောင်း)အပါအ၀င် ၃၇ ဦးက လက်မှတ်ရေးထိုးတင်ပြထားခြင်းဖြစ်သည်။
“ ကျွန်တော်တို့ကအဲဒီနေရာဟာစိမ့်စမ်းရေဦးနေရာဖြစ်တယ်။ အောက်မှာလည်းရေပိုက်တွေသွယ်ထားတယ် ဆိုတာ တင်ပြတယ်။ ဒါတွေကိုစည်ပင်ကိုယ်တိုင်ရော၊ မြို့နယ်အုပ်ချုပ်ရေးရောသိလို့မဖြစ်နိုင်ဘူးဆိုတာ အကြောင်းပြန်တယ်။ အဲဒါကိုအခုလွှတ်တော်အမတ်ကနေ ဒုဥက္ကဋ္ဌဖြစ်တဲ့ ဦးတိတ်ဆန်းကဆောက်လို့မရရင် မဆောက်တော့ဘူးဆိုပြီး အမတ်ဘ၀မှာတုန်းကနောက်ပြန်ဆုတ်သွားတယ်။ အခုလွှတ်တော်ဒုဥက္ကဋ္ဌဘ၀လည်း ရောက်ရော သူကပြန်လာတယ်။ အဲဒီနေရာကို ပြန်ဆောက်မယ်လုပ်တယ်။ အဲဒါကို ကျွန်တော်တို့က ၀န်ကြီးချုပ်ဆီ ဖုန်းနဲ့ဆက်သွယ်ပြောတယ်။ သူလိမ်ခဲ့တာတွေကိုပါပေါ့နော်။ပထမအကြိမ်ကတည်းက ဒီနေရာမှာ ဆောက်ခွင့်မပြုဘူးဆိုတာအကြောင်းပြန်ထားတယ်ဆိုတာကို။ အဲဒါတွေဝန်ကြီးချုပ်ကမသိဘူး။ အခုတော့ လက်ရှိစည်ပင်ဝန်ကြီးက သူတို့ရပ်လိုက်ပြီဆိုပြီး အကြောင်းပြန်တယ်။ စာပါထုတ်တယ်။ ကျွန်တော်တို့တားတာကအန္တရာယ်ဖြစ်လာမှာစိုးလို့ပါ’’ဟု ဦးနိနိုင်းက ပြောသည်။
၎င်းတို့တင်ပြချက်အရ အဆိုပါ NLD ရုံးဆောက်လုပ်မည့်မြေနေရာသည် စိမ့်စမ်းရေတွင်းဦးဖြစ်ပြီး မြေကြီးအတွင်း၌ စိမ့်စမ်းရေသွယ်ထားသည့်ရေပိုက်များရှိပြီး လက်ယက်တွင်းလည်းရှိသည့်အပြင် NLD ရုံး ဆောက်လုပ်လိုက်ပါက ရေများညစ်ညမ်းသွားမည့်အပြင် အဆိုပါနေရာသည့် သဘာဝဘေးအန္တရာယ်ကြောင့် မြေပြိုဖူးသည်ဖြစ်၍ ခွင့်မပြုသင့်ကြောင်း သိရှိရသည်။
မင်းသီဟန် ( အကုန်သိ သတင်းဌာန )
0 comments:
Post a Comment