ရန်ကုန်မြို့ရှိ အိန္ဒိယစင်တာ၌ အိန္ဒိယ-မြန်မာကုန်သည်ကြီးများအသင်း၏ တွေ့ဆုံဆွေးနွေးပွဲအား ဇန်နဝါရီ ၂၉ ရက်ကကျင်းပခဲ့သည်။
အိန္ဒိယ-မြန်မာ နှစ်နိုင်ငံ ကုန်သွယ်မှုနှင့်ရင်းနှီးမြှုပ်နှံမှုအခြေအနေများကို ပိုမိုတိုးမြှင့်ဆောင်ရွက်လျက်ရှိပြီး အိန္ဒိယနိုင်ငံသည် မြန်မာနိုင်ငံ၏ အဓိကကုန်သွယ်မှုမိတ်ဖက်နိုင်ငံဖြစ်ကာ (၂၀၂၁- ၂၀၂၂)ခုနှစ်တွင် ကုန်သွယ်မှုတန်ဖိုး အမေရိကန်ဒေါ်လာ ၁ ဒသမ ၈၉ ဘီလီယံခန့်ရှိခဲ့၍ ဆက်လက် တိုးတက်ရန်ဆောင်ရွက်သွားမည်ဟု ထိုပွဲသို့ ဂုဏ်ထူးဆောင်ဧည့်သည်တော်အဖြစ်တက်ရောက်ခဲ့သောကျန်းမာရေးဝန်ကြီးဌာန ပြည်ထောင်စုဝန်ကြီးဒေါက်တာသက်ခိုင်ဝင်းကပြောကြားခဲ့သည်။
ထို့ပြင် ဆေးဝါးပစ္စည်းများသည် အိန္ဒိယနိုင်ငံမှ မြန်မာနိုင်ငံသို့ အဓိကသွင်းကုန်ပစ္စည်းဖြစ်၍ မြန်မာနိုင်ငံရှိ ပြည်သူများအရည်အသွေးပြည့်ဝသော ဆေးဝါးများ လက်လှမ်းမီရရှိစေရန် အိန္ဒိယနိုင်ငံထုတ်ဆေးဝါးများအား ကျန်းမာရေးဝန်ကြီးဌာနမှ ဆေးရုံများတွင်အသုံးပြုနိုင်ရန် နိုင်ငံတော်ဘတ်ဂျက်ဖြင့် နှစ်စဉ်ဝယ်ယူဖြန့်ဖြူးပေးလျက်ရှိပြီး အစားအသောက်နှင့်ဆေးဝါးကွပ်ကဲရေးဦးစီးဌာနမှလည်း တင်သွင်းလာသည့် ဆေးနှင့်ဆေးပစ္စည်းများ သွင်းကုန်လိုင်စင်လျင်မြန်စွာရရှိရေး၊ပြည်သူများ ဘေးကင်းလုံခြုံစိတ်ချစွာအသုံးပြုနိုင်ရေးတို့ကို ဆောင်ရွက်နေသည်ဟု ပြောသည်။
ထို့ကြောင့် အိန္ဒိယနိုင်ငံမှဆေးပညာရှင်များ မြန်မာနိုင်ငံသို့လာရောက်၍ မြန်မာဆေးပညာရှင်များနှင့်ပူးပေါင်းကာ ဆေးကုသမှုများဆောင်ရွက်ရန်နှင့်ဆေးဝါးစက်ရုံများတည်ထောင်၍ ရင်းနှီးမြှုပ်နှံရန် ပြည်ထောင်စုဝန်ကြီးကတိုက်တွန်းပြောကြားခဲ့သည်။
ထို့ပြင် နယ်ပယ်အသီးသီးတွင် တွေ့ကြုံရသည့် အခက်အခဲများကို ပူးပေါင်းဖြေရှင်း၍ နှစ်နိုင်ငံကျန်းမာရေးကဏ္ဍဆိုင်ရာ စီးပွားဆက်ဆံရေးတိုးမြှင့်ဆောင်ရွက်ကြစေလိုသည်ဟု ပြည်ထောင်စုဝန်ကြီးကပြောကြားခဲ့သည်။
မြန်မာနိုင်ငံဆိုင်ရာ အိန္ဒိယသံအမတ်ကြီး H.E. Mr. Vinay Kumar ကလည်း အိန္ဒိယ-မြန်မာနှစ်နိုင်ငံကြား နယ်ပယ်ကဏ္ဍအသီးသီးတွင် ပူးပေါင်းဆောင်ရွက်နေမှုများကို၄င်း၊ အိန္ဒိယ-မြန်မာကုန်သည်ကြီးများ အသင်းဥက္ကဋ္ဌ Mr. Naresh Kumar Dinodiya နှင့် အတွင်းရေးမှူးတို့ကလည်း အိန္ဒိယ-မြန်မာ ကုန် သည်ကြီးများအသင်း၏ ဆောင်ရွက်မှုများကို ၄င်းရှင်းလင်းပြောကြားခဲ့ကြသည်။
ဆွေးနွေးပွဲသို့ ကျန်းမာရေးဝန်ကြီးဌာန၊ကုသရေးဦးစီးဌာန ညွှန်ကြားရေးမှူးချုပ်၊အစားအသောက်နှင့်ဆေးဝါးကွပ်ကဲရေးဦးစီးဌာနမှ ဒု-ညွှန်ကြားရေးမှူးချုပ်၊ရန်ကုန်တိုင်းပြည်သူ့ကျန်းမာရေးနှင့်ကုသရေးဦစီးဌာနမှူးနှင့်တာဝန်ရှိသူများ တက်ရောက်ခဲ့ကြသည်။
Popular
0 comments:
Post a Comment