တောင်တရုတ်ပင်လယ်ပြင်တွင် ဖြစ်ပေါ်နေသည့် မုန်တိုင်းအကြွင်းအကျန် လေပွေလှိုင်းများ၏အရှိန်ကြောင့် ၂၀၁၉ ခုနှစ်၊ ဇန်နဝါရီလ ပထမသီတင်းပတ်အတွင်း၌ တိုင်းဒေသကြီးနှင့် ပြည်နယ်အချို့တွင် မိုးရွာနိုင်ခြေရှိကြောင်း မိုးလေဝသနှင့် ဇလဗေဒညွှန်ကြားမှု ဦးစီးဌာနမှ ညွှန်ကြားရေးမှူး ဦးကျော်လွင်ဦးက ပြောကြားသည်။
အဆိုပါလေပွေလှိုင်းသည် ကပ္ပလီပင်လယ်ပြင်ဘက်သို့ ရွေ့လျားနိုင်ခြင်းကြောင့် မြန်မာနိုင်ငံတောင်ပိုင်းဒေသများနှင့် အရှေ့ပိုင်းဒေသတို့တွင် မိုးများရွာသွန်းနိုင်ဖွယ်ရှိနေပြီး ဇန်နဝါရီလ ဒုတိယပတ်အထိ မိုးဆက်ရနိုင်ခြေရှိကြောင်း ၎င်းက ပြောဆိုသည်။
ဇန်နဝါရီလ ၁ ရက်နေ့အတွက် မိုးလေဝသဌာန၏ ခန့်မှန်းချက်များအရ ရှမ်းပြည်နယ် (အရှေ့ပိုင်း) တွင် နေရာစိပ်စိပ်၊ တနင်္သာရီတိုင်း ဒေသကြီးတွင် နေရာကျဲကျဲ၊ ရန်ကုန်တိုင်းဒေသကြီး၊ နေပြည်တော်၊ ပဲခူးတိုင်းဒေသကြီး၊ ရှမ်းပြည်နယ် (မြောက်ပိုင်းနှင့် တောင်ပိုင်း)၊ ကယားပြည်နယ်၊ ကရင်ပြည်နယ်နှင့် မွန်ပြည်နယ်တို့တွင် နေရာကွက်ကျား မိုးရွာနိုင်ပြီး ရွာရန်ရာနှုန်း ၈၀ ဖြစ်သည်။
The Voice
0 comments:
Post a Comment